غسالة كريازي مش بتصرف المياه — إزاي تحلها بنفسك

الأول: صرّف المياه اللي جوه

قبل أي حاجة لازم تفضّي المياه، وإلا هتغرق المطبخ أول ما تفتح الفلتر. افصل الغسالة من الكهربا.

في الركن السفلي الأمامي هتلاقي باب صغير أو غطاء. افتحه، هتلاقي جواه الفلتر وجنبه خرطوم رفيع قصير مقفول بسدادة — ده خرطوم الصرف الطارئ.

• حط طشت واطي أو فوطة كبيرة تحت الفتحة
• اسحب الخرطوم الرفيع وشيل السدادة
• سيب المياه تنزل بالكامل (ممكن تملا الطشت أكتر من مرة)
• رجّع السدادة وادفع الخرطوم مكانه

تاني: نضّف فلتر الطلمبة

الفلتر ده وظيفته يمسك أي حاجة صلبة قبل ما توصل للطلمبة. لو اتسد، الطلمبة بتلف من غير ما تسحب مياه، والغسالة بتقف وتحتفظ بالمياه عشان تحمي نفسها.

لفّه عكس عقارب الساعة واسحبه. اللي هتلاقيه جواه غالبًا: شعر، وبر، دبابيس، وعملات معدنية — دي أكتر حاجة بنلاقيها.

• نضّف الفلتر تحت الميّا بفرشاة أسنان قديمة
• حط صباعك جوه المكان اللي كان فيه الفلتر واتأكد إن مروحة الطلمبة بتلف بحرية
• رجّع الفلتر وازقّه لحد ما يتربط تمام (لو مش مربوط صح هيسرّب)
• شغّل برنامج صرف أو عصر لوحده وشوف

تالت: خرطوم الصرف

لو الفلتر كان نضيف أو نضفته والمشكلة موجودة، بص على الخرطوم اللي طالع من ورا الغسالة.

لازم يكون مش مثني ومش مزنوق ورا الغسالة، وطرفه مش غاطس في مياه راكدة جوه البلاعة. ولو داخل في ماسورة الحوض، جرب تفصله وتحطه في دلو وتشغّل الصرف — لو صرّف في الدلو، المشكلة في ماسورة المطبخ مش في الغسالة.

لو كل ده متظبط والمشكلة موجودة

دلوقتي المشكلة داخلية فعلًا، وفي الغالب واحدة من تلاتة: طلمبة الصرف نفسها محروقة، أو حساس مستوى المياه (البريسوستات) بيقرا غلط فالغسالة فاكرة إن فيه مياه، أو الكارت.

الطلمبة أرخصهم وأسرعهم في التغيير، والحساس بعده. دول بيتصلحوا في البيت في نفس الزيارة غالبًا.